| | |
لاشتراك فى مجموعة قروب خليجيات
فى صندوق التسجيل ضع أميلك بشكل صحيح ثم اضغط على اشتراك
| |||||||
 |
| | LinkBack | أدوات الموضوع | إبحث في الموضوع | انواع عرض الموضوع |
2010-04-13, 09:47 PM
| #1 (permalink) |
| من كبار الاعضاء  تاريخ التسجيل: Oct 2008
المشاركات: 17,921
معدل تقييم المستوى: 1971  |  جدتي أكشخ من جدتك [ يوجد جدات يهايطون ] توفاايه! الله لايشمت بنا ديرمتك تقليد  فوووفووو!!! حطي شيلتس على راستس الله لايخزينا   دايم نسمع مقوله ابوي اقوى من ابوك طيب جداتنا ليه ما نهايط فيهم هم الخير والبركه اكيد مافيه احد مامرت عليه فقشه حلوة من جدته انا مابقى احد في الحارة من خطبني لاني كشخه  وكلن يعيش تخيلاته وشلون كانت كشخه جدته عاد حبينا نكشف الستار عن موضه وكشخه جداتنا عام الف وحطبه ايام ما كانت سور مملكة المراة طين تابعونا  المصدر: منتديات المنطقة الشرقية - من قسم: الازياء الجمال []jd H;ao lk []j; F d,[] []hj dihd',k D lk H;ao pdhm []jd [dj; dihd',k d,[]   |
|  |
|
2010-04-13, 09:49 PM
| #2 (permalink) |
| من كبار الاعضاء تاريخ التسجيل: Oct 2008
المشاركات: 17,921
معدل تقييم المستوى: 1971 | في حي من أحياء الرياض القديمة وتحديدا في بطن حوي أم محمد مجتمعين شله حريم الجيران يتباحثون في أحوال الأمة  مادريتي فلانه تطلقت .. مادريتي أبو فلان أعرس على حرمته .. مادريتي سليمان ولد أم حمد خطبوا له بنت أبو سعد وش زينها سمينه وبيضاء وجدايلها لين أسفل ظهرها وطبخها وش زينة ( ملكة جمال سنة السبلة خخخـ  )..أم محمد : البارح رحت مع أختي لشارع الوزير وش شارع الوزير ذا كل شي فيه وش زينه قضيت والله مقاضي وش كثرها عطاني أبو محمد كسوة الشتاء ميه [ شهقوا كل الحريم وطارت عيونهم هآآآآآآآآآآآآآآآآآآآآآآو ميه ]أم سعد : والله أبو سعد من خذته من 30 سنة ماقد مد لي الميه مهوب يعطيني كسوتي إلا خمسين ريال ويقول واجده بعد ..أم محمد : سكتت وماكملت وبينها وبين نفسها تقول لازم غسال فناجيلكم اليوم أشربه ..أم ناصر : أنا والله ذا الأسبوع رحت أشتري لي أغراض من المحلات اللي توها فاتحه في أول شارع الخزان شريت لي شلاح ( جمع شلحه ) وقماش شالكي وشريت قماش بوال وش زين ألوانه وعطيته جارتنا أم فهد تخيطه لي ..الحريم : أم فهد وش زين خياطها بس صارت غاليه تخيط القماش الواحد بعشر تريل أول ماتعدى سبعه تريل .. أم سعد : لا والله أنا توني متعامله مع وحده يقالها أم مرزوق ساكنه في السباله تخيط القماش الواحد بخمس تريل حتى مره عمي هي وبناتها وخواتها يخيطون دراريعهم عندها .. سوت لي دراعه زم وفيها كسرتين على اليمين وكسرتين على اليسار حتى جازت الدراعه لأبو سعد ( ياعيني على رجاجيل منول فستان بكسرتين يخققه )أم منصور : لاوالله أنا أخيط دراريعي بنفسي أوفر هالخمسة والعشرة لشي ثاني ينفعني ( الظاهر هالآدمية من مؤسسين الغرفة التجارية خخخـ )أم ناصر : أنا والله مابعد كملت أغراضي ابي صابون أبو عنز وصابون ممسك ( لاحد يسألني وش ذا جدتي مغششتني )وكريم أبو وردة وكيلو حنا شهب شعري من شهرين ما حطيت فيه حنا ..أم محمد : وش رايك بكرة نروح الضحى مع بعض للسوق .. أنا والله ودي أشتري لي قماش نزك .. وبمر محل توه فاتح جديد في شارع الخزان اسمه الحفيز ( ترى صدق هالمحل كان موجود على ذمه جدتي أنا أبراي لله ماقد شفته )أم سعد : إيييييه عرفته مره ولدنا تقول ان هالمحل كل شي عنده حتى عنده شلحات جديدة تلمع وقماشها يزلق وعنده بعد شلحات طرفها فيه كشكشه جازت والله لأبو سعد ( أبو سعد مسوي نفسه ايلي صعب سنة السبله يقيم موضة أم سعد )..الحريم : أشوى مير علمتينا نشتري من هالشلحات درازن .. أم ناصر : أنا عاد بروح لبيتي وراي غسيل أبو ناصر مابعد غسلته الله يشق بالعدو قبله يلبس وينطل هدومه كوم في الصهروج ثلاث ثياب وثلاث سراويل سنة ومقوصرين ..أم سعد : يووووه وش هالفسق عند أبو ناصر ياحبي له أبو سعد في الأسبوع مهوب يلبس إلا ثوب واحد وصروالين سنة يتعاقبها في الأسبوع ومقوصر واحد حبيب أبو سعد يقول مالله امر بالطغى حتى الشامبو يجلس ست شهور عنده مهوب يخلص ( على بالها تمدح ألحين )أم محمد : والله لي أسبوعين ما مشطت شعري بروح لأم عبدالعزيز اللي بيتها بأسفل السكه تمشط شعري مابقى شي على عرس ولد أخوي وبشوف عاد احط حنا بيدي وإلا أحط دوج ( ترى أول عندهم شي اسمه المشاطه يعني زي الكوفيرا في هالوقت وبمالمناسبة ترى فيه حريم أول مايمشطون ويكدون شعرهم إلا مره كل أسبوع لأن شعورهم أول مافيه أطول وأكثر منها .. تتمصع كتوفهم كل يوم يكدونها --> ونعم العذر )أم منصور : وش تبلبسين في عرس ولد أخوك .. أم محمد : أبو محمد جعل عيني ماتبكيه شرى لي دراعه أم عصا و دراعه مسرّح وقال لي اختاري منها اللي تبين  ( القماش المسرّح حسب مافهمت انه قماش يجيبونه من الهند يعني زي أقمشة الهنود هذا والله أعلم )الحريم : الله يسخرلك أبو محمد لاتحكين على أحد انه يكرمك ويغليك ترى ماحد يرحم ( فيس يقول والله الخوف منكم انتم )..أم ناصر :إلا ماتخبرون وحده تبيع ديرم أصلي .. وصيت مره أخوي وجابت لي ديرم كنه خشبه بارد ومايلون الخشة ( أقلام فلومستر مب ديرم )أم محمد : إلا أنا عندي ديرم أصلي جايني من وحده ساكنة برى الرياض تعرف للديرم الأصلي وش زينه والله يخلي بريطماتك لونها كنه دم غزال ..أم ناصر : إيه الله يعافيك عطيني منه شوي لي شهر أدورّ ديرم أصلي وترى عندي شي توه جديد يقولون تحطينه في شفتك يقعد يوم كامل مايروح كنه ديرم بس لونه غير تشوفين لونه علبته غير وفي براطمك غير ( تقصد الروج السحري )..الحريم :هآآآآآآآآآآآآآآآو ذا شي مستنكر وش ذا يا أم ناصر أخاف انه شي حرام ..أم ناصر : لا مهوب حرام هذي وحده ساكنه في الشميسي تبيعه وخذت لي منها علبه وحده شوفيه يا أم محمد كانك تبين منه ترى الحبة بست تريل ( الله يديم الرخص )..أم محمد : أجل بوصيك تجيبين لي من هالحرمه حبتين وإلا أقول لك خليها درزن بوزع على خواتي وحريم أخواني .. |
|
| |
|
2010-04-13, 09:50 PM
| #3 (permalink) |
| من كبار الاعضاء تاريخ التسجيل: Oct 2008
المشاركات: 17,921
معدل تقييم المستوى: 1971 | ألحين معظمكم فهوا مايدرون وش جداتنا منول يحتسون عنه وأغلبنا مالحقنا الا على الكتوف المنفخه والبناطيل الضيقه من فوق ومن تحت وسيعه منول معظم إهتمامهم بشوشهم كانت توصل للامتار ماشاء الله وتقول لا توه قصير مهوب زي شعر الحصي بنت دحيم وش عليتس من حصيصه يمكنه مناسب لها وأنتي لا بس هي مصره أبو عيالها مايحب الا الشعر الطويل   كريم أبو ورده أهم شيء يحطونه على شوشهم يطول الشوشه ويكثرها ويهبطها ويالله من فضلك ووش رخصه ووش زينه الاصلي أصلي  بريل كريم هذا عرفته تقريبن من سنه من جدتي تمدحه مدح تقول مايزين الشوشه الا هو مهوب ذآ الللي تحطونها بشعوركن حق الكشخه بس ذآ لين تسبحتو وحطيتو كريم الشوشه وش تسوون مهوب تخلونها منتفشه ضفوها  هذي عدة البنت منول شامبو أحمر وش زينه وكريم أبو ورده وبنس سود تضف شويشتها فيها ويادار مادخلك شر مهوب زينا ألحي عطر للشعر وكريم شعر وشامبو بلسم ووو..الخ  الشامبو هذا الاحمر ماله ريح ترآ وش زينه يطول الشهر وينظفه عاد عقب ماتتسبح جدتك وتلبس وتكشخ بالشيله وسروال خط البلده وهي محنيه يديها تكحل يامال الغنيمه  هذا الكحل يصب هنا ويكحلون عيونهم بالحديد  وتعطر وتعطر البيت  شوفوا هذي عدتها وعدة البيت وعدة أبوهم وبناتها وكل شيء عاد مع التمدن الله لا يتفننا بمعصيه بدت تطلع عندهم أشياءات جديده مثل الروج السحري لونه أخضر  ولين حطيتيه على براطمتس يقلب لونه ترآ للحين هابين فيه العالم مايدرون أنه من سنة الغرقه brb  |
|
| |
|
2010-04-13, 09:57 PM
| #4 (permalink) |
| من كبار الاعضاء تاريخ التسجيل: Oct 2008
المشاركات: 17,921
معدل تقييم المستوى: 1971 | تتوقعون لو فيه نت وقت جداتنا وش بتكون مملكة المرأة في عصرهم .. أنا أتوقع أول شي خلفية المنتدى بتكون قماش زري وفيه ايقونه على شكل سواني .. لما نسمع جداتنا يسولفون عن موضتهم الفاشنية أول نقول الحمد لله إننا عشنا بعد فترة حرب الخليج ( وش تبين )صح كل شي في تطور ومافيه وجه مقارنه بين شي كان قبل خمسين سنة وبين ألحين .. بس لاتستهينون في جيل سنة السبلة كان بينهم حركات مجاكر يعني لك وحده تقول عساني أزين من أم الجيران ..وتخيلوا لو عندهم كافية مملكة المرأة وش ممكن يسولفون فيه .. أم محمد ودي أحط فص كريستال في ضرسي وش أزين عيادة أسنان وإلا تجي أم سعد تقول والله ناوية أسوي تنظيف أسنان وش تنصحون وين أروح أي عيادة .. وتدخل أم فهد عرض تستشيرهم في أمور الليز ر ..وإلا تجي أم خالد ضايق صديرها تقول بنات أنا مره متنكده وجهي طلع فيه حبوب شباب وش أسوي حطيت خلطة الزبادي ومانفعت وحطيت خلطة التفاح و صار وجهي أحمر أنا انهرت وش أسوي .. تخيلوا هالشيء اللي مكتوب فوق أصلاً يطلع لكم شي يقول قيم أوفر خخخخخخـ..معروفه وش بتصير سواليفهم أم محمد من زمان مامشطت شعري من أزين وحده تمشط الشعر جارتكم أم دحيّم وإلا أم ناصر ..وتجي أم منصور تقول يا رفيقاتي عندي قطعه قماش بوال مدري وش أفصلها أخليها كسرات وإلا بس زم من عند الخصر ..وتسوي أم محمد تسجيل دخول للمنتدى وتجي تراكض للكافية يا حريم جاني ريح في وجهي وقب كله أحمر( ترى أول جداتنا مايعرفون شي اسمه حبوب شباب أي شي يجيهم لو انه مغص في البطن قالوا ريح عاد وش هالريح الله أعلم ضمير مستتر في علم الغيب وحتى حاولت أستفسر من جدتي وش هذا الشي اللي اسمه ريح قالت شي من الله قلت طيب وشو قالت لا تسألين شي يجي بسم الله علينا من الشر قلت يعني جن قالت لا مدري !!..يعني أي شي يجيهم يقولون فلانه فيها ريح وجهها فيه بقع حمراء وإلا فلانه فيها ريح رجلها ماتعينها توجعها )..ونجي عاد لخلطاتهم الله يرحم من مات منهم ويطول بعمر اللي حيين منهم ..تتشكى أم ناصر تقول قبل ظهري شاب علي لو أشيل أدنات الدون شب علي وتجي أم محمد وتعطيها وصفة .. أبد خذي لك زيت سمسم وحطي معه زنجبيل مطحون وشوي حبه سوداء وخليه على النار خمس دقايق وأدهني به ظهرك أسبوع وبتصيرين غزال .. وتسأل أم سعد والله ولدي سعد طاح من الروشن وانفلق راسه وش أسوي به ضروري ردوا بسرعه وترد عليها أم فهد خذي شوي مسمار مطحون ( المسمار له اسم ثاني وهو العويدي ) وأفركي راسه بالمسمار يومين وبينخاط راسه ( خلاص قفلوا المستشفيات ) وترد أم سعد الله يساعدك ويوفقك ويسخرلك يا أم فهد جعل الله لايفجعك على أحبابك ..وتدخل هيله على المنتدى وتكون توها عضوه جديده وعلى وجه عرس وتسأل عاد المخضرمات أم سعد وأم محمد وش أزين خياطة في الحارة الفلانية .. طيب ودي بشلحات طرفها دانتيل وين ألقها فيه جعل الله يسخرلكم رجالكم .. وطبعاً مايقصرون أم محمد وأم سعد ويعطونها من هالنصايح الله يجعلها في ميزان حسناتهم ويحرّصونها اسمعي كلام خالتك وقهويها كل يوم هي وخالك وسوي لهم مراصيع كل فجرية ..وتجي أم سليمان تسأل من عنده مزرعه ويتبرع لنا بتمر سكري ونبوت سيف لأن عندنا حالة ولادة ومحتاجين تمر نسوي للحرمه حنيني ومحلا عشانها في النفاس بيجون حمولتها يتحمدون لها بالسلامه ( يا بساطتهم مهوب ألحين خمس أنواع حلى مع القهوة غير عن سلات الشوكلاته اللي من كذا محل .. وطوافير الفطاير من كل نوع وغير عن البوفيه اللي على مد النظر )..وتجي أم خالد تستهبل وش أحط لحمولتي غداء مرقوق وإلا قرصان وتجيها المشرفة وتعطيها كرت أحمر .. ونتخيل لو فيه موضوع زي موضوع " عروسنا يا ساكنه في القصر كيف نطولك " ..خلونا نشوف الحرمه لين جت تعرس وشلون تقضي مقاضي عرسها أول عيب وشق جيب إن البنت إذا انخطبت تروح تقضي تنطق بالبيت وتروح أمها وخالتها أو عمتها يقضون اغراضها أول غرض يشترونه قماش أم عصا وهذا الشيء تلبسه العروس لين حطوا لها زواره أو عزيمة وعادي لو تلبسه في صبحية عرسها .. ويشترون لها أقمشة مثل قماش على روز ( أتوقع هذا القماش يشبه قماش جلال الصلاة ) وقماش شالكي ويكون مخلوط بصوف يعني ملمسه يكون فيه صوف ( ترى مدري بس غشيت المعلومة من جدتي ) وقماش نزك ويستخدمون هالقماش عشان يفصلونه صراويل طويلة زي صروايل السنة تلبسها الحرمه تحت الدراعه ( يدورون الستر ).. وطبعا هالأقمشة لازم تتخيط من يخيطها ياترى مشغل الدراعه وإلا مشغل فلانه تروح أم العروس لوحده في الحارة معروف إن عندها مكينه خياطة وتعطيها الأقمشة وطبعا ما ياخذون العروس عشان تاخذ قياسها أصلاً العروس ماتدري إنها بتعرس يصدمونها يوم العرس يقولون لها قومي نروشك اليوم عرسك وتطقها صياح البنيه .. زين ما انغرف عقلها من الروعه  د .. المهم نرجع لسالفةالقماش تودي الأم الأقمشة لوحده من حريم الحارة تعرف تخيط وتقول هذي نبيها لبنتي هيا بتعرس الأسبوع الجاي وتوصف لها جسمها وتخيط أم محمد القماش بناء على وصف أم العروس ( الأولين أمرهم سمح وتساهيل مهوب مثلنا عشرين ألف بروفه وعسى الفستان يضبط )ويشترون لها سجادة وجلال صلاة ( الأولين كلهم عبادة وطاعه ).. ويشترون لها مخنق تشخص به عند أبو الشباب أول أيام عرسها ..ويشترون لها شلحات مهوب أقل من درزن وتستخدم الشلحات أيضاً بمقام قميس النوم .. وبالنسبة للميك آب ديرمه وكحل حجر ( يجي في علبه حديد ) و مرش ( شي يحطون فيه شوي مويه ورد وشوي كلونيا ومن ضمن العطور اللي يستخدمونها عطر أباريز.. رفلود .. بنت السودان --> وهالمعلومات هذي على ذمه جدتي ) وبالنسبة لجمال البشرة يشترون لها صابون أبو عنز وكريم فازلين بس يكون لونه أخضر وعلبته دائرية ( الظاهر موجود للحين هالشيء بس نادر ) وبالنسبة للكشة يشترون لها كريم أبو وردة .. وبلكريم .. ويشترون لها زيت نارجين و زيت سمسم عشان تحافظ على لمعان شعرها ويطول ..ويودون أغراض العروس لبيت حمولتها مب بشناط يودونها بأقمشة ويلفون القماش واللي مره كشخة يحط أغراض العروس بقماش زري ..في اسبوع إلا وهم مخلصين مقاضي للعروس ومحنين شعرها ويدينها ورجلينها وصلى الله وبارك لاحجز عند كوافير بذيك العده ولا مشاوير على الأسواق ولا مطامر على المشاغل ولا هاجين رادين على الخياطة عشان البروفات .. طيب لو فيه موضوع زي موضوع لكل أم مستقبلية .. وش بتكون سواليفهم .. والله ماودي أحلف إن كل الردود بتكون عليك بالحلبة عليك بالحلبة عليك بالحلبة خخخخخخـ .. وتجي منيرة تسأل ولدي توه ماكمل شهرين وفيه حرارة وش أسوي به وتجي المخضرمة أم محمد وتقول أبد مافيه إلا العافية عطيه مُره أو حلتيت أسبوع وبيطيب ( ترى المُره والحلتيت الدواء الرسمي لجداتنا أي شي يوجعهم يشربون مُره وحلتيت يعني معتبرين المُره والحلتيت زي العصا السحرية اللي تعالج كللللللللللللللل شي )..وتدخل حصة المنتدى وتكون واصلة في الشهر الثامن وتكتب رد نصه فيسات تصيح شكلي على وشك ولادة وش أسوي بعمري وترد أم سعد المخضرمة وتقول لها تدخني بمستكه مده شهر وإن شاء الله بتتسهل ولادتك واسمعي إذا أونستي الطلق قولي لخالتك أم رجلك تفرش رمل في الحوش وأنسدحي عليه ترى الرمل يهون شوي من وجع الطلق .. وتجي سارة توها حديثة عهد في مجال الأمومة تقلق أم العضوات بالأسئلة .. أنا في الشهر الخامس وعندي قماش نزك ست امتار ابغى وحده تعرف تخيط مهاد بزارين وين بلقاها في أي حي .. طيب وش الأشياء اللي بحتاجها وقت النفاس غير الكمون والقرفة عشان يمديني أروح لعطارة أبو عبدالله اتقضى |
|
| |
|
2010-04-13, 09:58 PM
| #5 (permalink) |
| من كبار الاعضاء تاريخ التسجيل: Oct 2008
المشاركات: 17,921
معدل تقييم المستوى: 1971 | من أهم كشخة جدآتنا اللي تجيب قماشها من الهند هذي قمة الكشخه والجخه بعد بنت عز واللي تفصل أم عصا هذي هي الكشخه سمحيين منول مهوب لين شافوا فلانه نفس موديلها بس غير اللون نطلوا الفستان وماعاد لبسوه   موديلات أم عصا وأشكالها بس بدون الحجاب الحجاب للستر وعروسهم يكشخونها بـ الذهب الهامه والكف ومدري وش بعد اشياءات تلامع تشوفها وانت في بيتكم  الهامه تنحط فوق الرآس ,, الكفه على الكف وذا العقود والخواتم والحلق اللي تطيح الاذن منه كلها تدل على الحاله الماديه للمعرس وأهل العروس ( صورة العروس هيول ووهي عليها الذهب بليلة عرسها)  الزري يجيبون لكم قماش عادي ويملونها تطريز يسمونه زري <= لا عاد توصفين  شالكي هذي الكشخه الكشخه تلبسه واللي بالنفاس يلبسونه ويكشخون عند حمولتهم ( ام عبدالعزيز السوري كاشختن فيه )  فستان ام العروس تكشخ به ويالله من فضلك  العبايه الفضفاضه واسعه تحطها وتحط الغطوه وتمرمر على بيوت بناتها كلهم واخياتها وتمر أميمتها على رجليها وعقبها ترجع تواسي الغداء لآبو صالح brb  |
|
| |
|
| مواقع النشر (المفضلة) |
| الكلمات الدلالية (Tags) |
| من, أكشخ, حياة, جدتي, جيتك, يهايطون, يوجد |
| أدوات الموضوع | إبحث في الموضوع |
| انواع عرض الموضوع | |
|
|
المواضيع المتشابهه للموضوع: جدتي أكشخ من جدتك [ يوجد جدات يهايطون ] | ||||
| الموضوع | كاتب الموضوع | المنتدى | مشاركات | آخر مشاركة |
| هل يوجد في كمبيوترك جاسوس | غير مسجل | رسائل قروب خليجيات | 8 | 2010-04-16 07:37 PM |
| أبشركم جدتي حصه أرجعت من الحج | (חשב כללי) | صرقعه | 7 | 2010-01-05 04:10 AM |
| العلم يؤيد الدين | شغف بإحساس | الطفل والأسرة والمجتمع | 3 | 2009-11-07 10:57 AM |
| ((جيتك جريح الكلام )) | محمد2009 | الشعر وأبيات القصيد | 1 | 2009-07-13 09:29 AM |
| {{جيتك وانا ماني بتايه الراي }} | محمد2009 | الشعر وأبيات القصيد | 1 | 2009-05-04 11:25 PM |
Sitemap
الساعة الآن 05:01 AM. 
Copyright © االمنطقة الشرقية Powered by vBulletin® Copyright ©2000 - 2023, Jelsoft Enterprises Ltd.
Search Engine Optimization by vBSEO 3.6.066a66.com
::..:: منتديات ::..::
 |  |
العرض العادي
