الشاعر جابر بن هايف الروقي العتيبي
اتركم مع القصيده
إليكم القصيدة ياجماهيري وهي خطره
وخلوا هالرقابة تسجن الشاعر وجمهوره
هدوءآ أيها السادة حظور الحفل والسهره
مساء الخير عالصاحي وأشوف الناس مخموره
أنا آسف على الإزعاج ولكن طالت السكره
ذكرت إني قبل ساعات أصير وعزوتي نوره
على فكرة الكرفته عجزت أفكها عسره
أبي واحد ينزلها أو أي وحده ومشكوره
جيبوا لي ثوبي الأشهب مع الغتره
قبل والله لأطربقها على هالحفل بحظوره
ولاواحد يتكلم قبل ماأخلص النشره
ومن يحكي قسم بالله لأدوس برجلي حنجوره
تراها قفلت ياسادت بلادي وياستره
وهي مادامها خربت بقول الليلة الثوره
أنا بحكي من أول يوم جيت لدنيت(ن) قذره
وتكرم عن قذارتها بيوت الله ومعموره
أنا مولود في ليلة شتا مع بردها مطره
في خيمة وسط صحرى مابها سستر ودكتوره
أنا ياحظرة السادة غريب وضاع من صغره
لعن جدي زماني بين مدهوره ومهجوره
حملت من الشقى مالايطاق وجايكم ذكره
ولاني عاجز أتحمل وأموت بنفس مقهوره
وأنا أدري يذبح الرجال كثر الصبر في قهره
وعن قهر الرجال المصطفى وحذر ومذكوره
وهم قالوا مفاتيح الفرج للحي في صبره
وأنا أشوف الفرج مفتاح ضاع وزاد طابوره
تعبت ألملم أيامي بيدين الهم والحسره
تعبت ألمع البرواز وأمسح غبرة الصوره
تعبت أبوس كف الجوع وخشم الفقر طال عمره
تعبت أكذب على الحاجه وأقول الحال ميسوره
تعبت أحمس من القهوه وأحط السمن والتمره
تعبت ودلتي وحده وكل شوي منثوره
أحسب العز بالدله وبيت النذل بها عشره
دلاله أكثر الملعون ومليانه ومسطوره
أنا بحكم البداوه أنزرع في داخلي بذره
عن علوم المراجل ألف بذره فيني مبذوره
تربينا على الدين ونطيع الله مع شكره
تعلمنا نصلي ونحفظ القرآن وكل صوره
تعلمنا نحب الضيف وفينا الكرم فطره
تعلمنا نقول الصدق لالفه ولادوره
تعلمنا نحلب النوق ونعرف وش هي البكره
تعلمنى الضما وحنا بيدين البير محفوره
تعلمنا وكثير اللي تعلمناه وش كثره
أخذنا درس يالدنيا بلا دفتر وسبوره
وأنتم ياسكارى الحفل عفوآ أيها الزمره
منو فيكم عرف قهر الزمان وظلمه وجوره
منو فيكم وطاه الجوع وذله وصفقه فقره
منو فيكم عرف يحتاج للقمه ونشف زوره
منو فيكم من الضيقه حفر بأصابعه قبره
منو فيكم رقد ليلة بوسط أجساد مقبوره
منو فيكم مشى حافي برمل كنها الجمره
منو فيكم سهر ليل الظلام بدون أباجوره
منو فيكم ماطاح ألفين مره وسلمت الجره
وأنا من قبل أطيح وجرتي بيديني مكسوره
لكم الماء والوجه الحسن والمال والخضره
ولنا حنا الضما والجوع وفقر وشيفت(ن) عوره
ولامره حظي ضحك في وجهي وأشكره مره
وغيري مبتسم حظه وكل أيامه مسروره
كتبت الشعر من صغري وبيوتي مابها كسره
وأنتم تبرزون الي كتب بيتين مكسوره
أنا ياحضرة الساده فقير ماأغتنى بشعره
مدام المومس الي تشتهي الأشعار مشهوره
وأنا ياحظرة الساده هنا الليله وعلى فكره
ترى هالبدله مسروقه ورجلي بجزمه محشوره
ولكن قلت أبحظر هالحفل والعمر أبختصره
وأبي أبدع معاكم وسط ليلة أنس ومحظوره
وإذا كانت رجولتكم بكاس الثلج والخمره
أنا باشرب بدون الكاس وثلجه ألف كاروره
أبوي قال لي مره دسم شاربك بالغبره
مايدري بالشنب محلوق وجابر فاقد شعوره
أنا بمشي مدام الليل ودع وأبتدى فجره
بروح أرد هالبدله على هالمعلاق مزروره
وأنا أدري ياكلاب الحفل إني بأنسجن بكره
مدام الليلة جبت العيد بهذا الحفل وحظوره
صح لسانه . . |
'JJ~hgj hgs;JJviJ~ Zrwd]i l[k,ki hgs;JJviJ~ 'JJ~hgj