| | |
لاشتراك فى مجموعة قروب خليجيات
فى صندوق التسجيل ضع أميلك بشكل صحيح ثم اضغط على اشتراك
| |||||||
 |
| | LinkBack | أدوات الموضوع | إبحث في الموضوع | انواع عرض الموضوع |
2010-07-31, 03:48 PM
| #51 (permalink) |
| ربي سألتك جنةعرض الفضاء()  تاريخ التسجيل: Jun 2009
المشاركات: 5,456
معدل تقييم المستوى: 744   |  جهزنا الغدا والكل تغدا وانا ما تهنيت جالسه افكر وش بسوي الحين يعني الخطوة الأساسية علي قمت قبلهم وغسلت ايديني ورحت للغرفة الي ينام فيها انتظرت يمكن ربع ساعه في الأخير سمعت صوت الباب يوم فتح ناظرني تفاجأه ابتسم وانا تعالوا دوروني ودي الأرض تبلعني جا وجلس جني وانا منزلة راسي مد يدة ومسك ايدي الي ترجف وقالي : نوره مراح تندمين ان شاءلله بكون لك الزوج والاب والاخ والولد بعد وضحك يبي يوخر من الأحراج ابتسمت وهنا بدت حياة جديدة مع عامر راح تشوفون احداثها في البارت الجاي الجزء السابع عشر خالتي ام عامر : عامر يمه روح جيب لنا من المخبز الطايفي خبز فرن مشتهيته عامر ويأشر على خشمة : على ذا الخشم وقف عامر وترك أيدي بعد ما رص عليها بعد ما طلع عامر للمخبز التفتت علي خالتي كنت حاسة أنها أرسلت عامر عشان تصرفه وتبي تسئلني خالتي : يمه بشري شكلك هونتي من إلي براسك هزيت راسي مدري ليش الكلمات صعبة تطلع مني احيانا الواحد ما يعرف يعبر تضيع الحروف يعجز يجمع جمله هزيت راسي وانا احاول اقنع نفسي قبل اقنع خالتي قعدت خالتي تكرر الجملة : الحمدلله الحمدلله الحمدلله الله يكملك يا بنتي بعقلك والله يرزقك بالذرية الصالحة يوم طرت خالتي الذرية حسيت بحساس حلو تخيلت شكلي وبأيدي طفل صغنون شايلته ابتسمت ورحت للمطبخ اذا بوه خبز فرن فأكيد يصلح معه حليب وجبن سايل وهذا كان المخطط الي اقترحته خالتي وصار عشانا خفايف جبت الحليب والكاسات ورجعت للمطبخ اجيب باقي الأغراض ومع جيتي صادفت جيت عامر نزلت الأغراض ورتبتهم أنا وياه كنا نوزع الكاسات وهو يصب الحليب وخبط راسه براسي ورفعت عيوني له همس لي : بسم الله عليك ارتجفت كلمته عاديه الكل يقولها بس نبرته غيييييييير فيها أحساس شعور صعب الواحد يترجمه يمكن تقول اختك بسم الله عليك يمكن يقولها اخوك يمكن امك ابوك أي شخص بس ما يكون تأثيرها مثل ما أثرت فيني كلمته مدري يا أنا أتخيل يا فعلا عامر حنون مو علي بس حتى على امه وابوه كتمت أنفاسي وجلست جنب خالتي اتهرب منه أحاول أهدي نفسي ابي أعرف افكر أبي افهم وش ابي اوصل له بعد ما تعشوا قام عمي وراح لغرفته ولحقته خالتي جيت بوقف الم السفرة لكن يد عامر مسكتني عامر : خليها عنك بتشيلها الشغاله تعالي مشيت معه وهو ما سكني مع يدي وكنت امشي معه وأنا ما أحس بنفسي اشياء تتضارب براسي فكرة رجوعي له فكرة تنازلي عن حقي لكن كنت اكرر كلمة يحبك يانوره يحبك حاولي حاولي تتقبلينه انتبهت اني وصلت للصالة الصغيرة للغرفة الي كان فيها عامر جلست على الكنبة وراح وجلس جنبي وفتح التلفزيون عامر وهو يبتسم : من اليوم ورايح لازم تسهرين معي كل يوم وانا اسهر بلحالي انا ما اعرف صراحه اجامل ولا أعرف اتصنع سكت ما عرفت وش أقوله قرب مني مره ومسك وجهي بيدينه الثنتين : نوره طالعيني رفعت عيوني له بصمت كنت احس بغصه بعبره خانقتني مدري وش سببها لا تسئلوني ورب البيت مدري لو اتكلم راح ابكي او تنزل دموعي عامر بهمس : وش فيك رفعت كتوفي علامة مدري وش فيني عامر : لا فيك شي قوليلي صار فكي التحتي يرجف بقوة ويديني وقعدت ابكي بصوت مسموع لدرجة اني عضيت على ايدي مابي صوتي يعلى مدري وش صار علي او وش صابني ضمني عامر له وكملت بكي بصوت اقل وانا ارجف واسمعه بقول بسم الله عليك هديت شوي عامر : بسم الله عليك وش فيك يا نوره اخيرا طلع صوتي وحسيت انه بدى يطلع : مدري عامر : وش تحسين به الحين تنهدت : والله مدري عامر : تعوذي من الشيطان واستغفري صليتي العشا ناظرته : لااا عامر : قومي صلي لا تأخرين الصلاه وستغفري رحت وقعدت اتوضى وارش على نفسي ماء خلصت الوضوء " اشهد ان لا اله الا الله واشهد ان محمد رسول الله" " لا اله الا الله وحده لا شريك له الملك وله الحمد وهو على كل شي قدير" " اللهم اجعلني من التوابين وجعلني من المتطهرين " فرشت سجادتي وصليت العشاء وستغفرت وسبحت وتسننتن وصليت الوتر بعدها حسيت براحة وانشراح صدر اعوذب الله من الشيطان الرجيم مدري وش صار لي معقولة كبت داخلي والحين طلع المهم خذيت القرآن وقريت خلصت عشر صفحات من سورة البقرة وقفلته ورحت لغرفتي ابي أبدل وغير من شكلي دخلت غرفتي احترت وش البس الحين الوقت متأخر وما يصلح البس تيور أو جلابيه بعد ابي شي مريح البس بجاما أخاف يضحك علي بس وش اسوي هي أكثر شي تريحني ياربي وش اسوي ماعليه بلبس بجاما واذا ضحك بكيفه اصلن هو ماهو خبير عادي عنده حتى لو بجلبيه رحت للدالوب وفتحته وطلعت بجاما بنطلونها ابيض وعليه رسمة فراولى صغار فوشي غامق والبلوزة فوشي غامق كاملة وعليها رسمة فراولى كبيرة بالوسط ومطرز عليها خفيف بالابيض اوف الحمدلله اريح كذا خذيت قلوس فوشي خفيف وحطيت ورفعت شعري كله ذيل حصان  ونزلت خصله طويله من قدام الي يشوفني بيقول رايحة تسهر مع اخوها مو زوجها ما عليه وش اسوي اجل اروح البس قميص نوم لو اموت ما سويتها وش بيقول عني فاصخه الحياء  اللهم احفظ المسلمين من بين أيديهم ومن خلفهم وعن أيمانهم وعن شمائلهم ومن فوقهم ومن تحتهم اللهم لاتمتني حتى أرى نصر المسلمين وعزهم |
|  |
|
2010-07-31, 03:49 PM
| #52 (permalink) |
| ربي سألتك جنةعرض الفضاء() تاريخ التسجيل: Jun 2009
المشاركات: 5,456
معدل تقييم المستوى: 744 | هو ما كان منتبه لي عرف اني دخلت بس بدون ما يشوفني عامر : تعالي نوره شوفي فلم عجيب نوره : منو البطل ناظرني يبي يقولي لكن شفت شلون قعد يناظرني شكيت لحظة أن فيني شي غلط نزلت عيوني وصرت اسحب البلوزة على تحت ابي تطول شوي وانا عيوني احاول أنها تناظر أي شي بس مو عيونه سمعته يتحنحن : حم .. حم تعالي نوره ليش واقفة ياربي انا استحي وهو بعد والله إحراج وقمة الإحراج مشيت لحد ما وصلت له وجلست وحاولت اكون طبيعية نوره : مشاءالله توك متعشي عامر : هههههههههههههه وش اسوي انا اذا صرت أشوف فلم أتحمس تدرين عاد أن هذا الفلم توني بروح اشتريه وزين انهم اعرضوه نوره : وش قصته وبدى عامر يحكي لي قصته وبدى شوي شوي يروح منا الإحراج ونضحك على القطات ونتحمس معها كان شوي حماسي لحد ما جت لقطة محرجة مره انا بغيت أموت مدري وش خلاني احط ايديني على عيوني بتقولون خبله بس من جد خبله واووووو طاح وجهي يوم قعد عامر يضحك عامر : ههههههههههههههههههههههههههه تبينا نطبق مثلهم تعالوا بعدها دوروني خلاص ودي الأرض تنشق وتبلعني ما عرفت وش اقول حسيت بحرارة فضيعه كانت سهرة حلوه كنت كل ما اشوف تعابير عامر وهو يضحك وهو متحمس اقول بنفسي لا عاد تحكمين يا نوره على احد بدون ما تعاشرينه صدق الأنسان ما يحكم من المظهر مظهر عامر مغرور شايف نفسه لكنة بالحقيقة معشراني نفسه خفيفة حنون مضى الليل وراي دوام بالجامعه وقتها قررت ما اداوم واخذ الأسبوع هذا كله لأني ما احب الغياب وعندي رصيد بقدر اعوض أن شاءلله بدت الأيام حلوة بديت اتقبل عامر بحياتي كا زوج وكنت اقوم الصبح قبل ما يقوم وسوي له فطور ولزم عليه يفطر وروح لخالتي وفطر انا وياها سوى وعمي وقعد سوالف معها واذا جا وقت الغدا اروح اسوي الغدا وبعدها اروح البس وتجهز لعامر كنت اشوف الفرحة والابتسامة في عيونه اذا شافني قاعده احتريه على طول يمد يدينه ويوقفني كنت اجلس على عتب بيتنا واذا جا سحبني من أيدي وقفني وقربني منه وباسني بديت احس أني زوجه وعلي التزامات وأن هالشخص تهمه راحتي كان يجلس معنا وقت العصر واذا اذن المغرب يروح مع راشد وخوياهم ويرجع متأخر شوي وقعد احتريه انا ما اتعشى إلا اذا تعشى معي يعني حياتنا تعبر مستقرة وحلوة وهادية وتشع حب اتذكر يوم الخميس كنت نايمة وتأخرت بالنوم لأني سهرت أنا وعامر لساعه ثنتين ما خلاني ارقد سمعت طق على باب الغرفة فتحت لخالتي الباب خالتي : نوره يمه منيرة متصله وتقول ضروري تجينهم نوره : بسم الله وش فيهم خالتي : خير ان شاءلله رحت ابي اقول لعامر لكن عجزت وأنا اقومه لكن الأخو نايم وغاطس بالنوم وما رضى يقوم رحت ولبست بسرعه وطلعت لقيت خالتي نوره : خاله ترى عجزت وانا اقوم عامر ابي اقوله اني بروح لهلي ياليت تبلغينه خالتي : ابشري يمه روحي ولا يهمك رحت وانا يمكن اركض مو امشي وش تبي منيره كل الأفكار الشينه اعوذب الله من الشيطان طرت في بالي اكيد ما نادتني إلا فيه شي شين قعدت اطق الباب وضرب على الجرس ابي يفتحون بسرعة يوم فتحت الشغالة الباب طيران داخل وما نتبهت لبزران صغار كنت يالله اتنفس : وش فيكم انصدمت شفت اعز انسانه على قلبي شفت فطوووووووم يا ناس متنت زيادة صارت دوووبه مره وحامل نوره : اووووووووووووووووووووووووه هلاااااااااااااااااا وغلاااااااااااا نورت الرياض ونجد هلا والله بمن زارنا فطوم : هلابك نوره ضميتها وقعدت ساعه انا وياها يا ناس اشتقت لها هذي فطوم نفسها نفسها بس طالت ومتنت زيادة ياربية نوره : ياربي يا فطوم مراح تسوين رجيم فطوم : وانا اقدر اسوي رجيم من انوي اسوي رجيم احمل من قالت احمل تذكرت بزرانها ورب البيت بطة كانت بنيه صغنونه بحضنها الخالق الناطق امها شعرها فلافل ودبدوبة وعيونه صغار شكله بريء تجنن ياناس نوره : هذي وش اسمها ومديت ايدي ومسكتها وقعدت ابوسها وقرص خدودها تهبل تهبل فطوم : هذي خولة نوره : والباقين فطوم : ما شفتيهم بالحوش يلعبون نوره : كنت خايفه وما نتبهت فطوم : فيه في الحوش حليمة الكبيرة وسفيان نوره : يا قلبي يا فطوم ليش ما تنظمين راح تتعبين ياربي فطوم مثل ماهي براءة : اسكتي يا نوره عندي انسان يبي يكثر نسله ويقول ابي ولد وبعدين الله يحب الودود الولود جتنا منور : هاه وش رايك بالمفاجأة نوره : الله يقطع عدوك ما طرى علي الا كل علم شين الله يا خذ ابليس منور : لا يا حبيبتي اعلومي كلها تهبل لو بعد اعلمك وقول اخونا المصون وش قرر نوره : منهو منور : من بعد رويشد نوره : وش فيه منور : لو ما خليناهم في البر يتمشون مع بعض ابرك الرجال مستعجل يبي يعرس وحجز اول يوم بالاجازة نوره : اوف الله يوفقه اهم شي منور : وانا وش اسوي شكلي بسقط انا من غير ما يكون عندي شي يلهيني دايم افكر شلون عندنا عرس نوره : الحين باقي فوق ثلاث شهور وانتي تفكرين من الحين منور : أي افكر ونسيتي بنروح للبر نوره : لا ما نسيت وبعدين خليني اخذ اعلوم فطوم فطوم كانت مشغولة تأكل خوله يالله من يصدق فطوم الصغيرة تصير مسئولة وام وراعية بيت الله يعينها بيطلعون الشيب براسها نوره : هاه فطوم واخبارك فطوم : الحمدلله وش اخباركم ليش ما زرتو امي تسئل عليكم تقول من زمان ما جونا نوره : تدرين مشاغل ودراسه على طاري الدراسة ما كملتي فطوم : لا ابشرك شهادة رابع ابتدائي كل ما اقول لقاسم ابي ادرس يقولي شهادتك عيالك ربيهم نوره : هههههههههههههههه الله يعينك منور : وهو صادق ريحي راسك فطوم : انتي بأي سنه يا منور اخبرك مو شاطره نوره : هههههههههههههههههههههههههه منور : حرام عليك يا فطوم رسبت بس سنه وبعدها حرمت والحين انا بثاني سنه بالجامعه فطوم وهي تفتح عيونها بصدمة : مشاء الله نوره : ههههههههههههههههههه فطوم منصدمة ما توقعتك شاطره فطوم : وانتي يانوره اخبارك جا عامر من السفر صح نوره : أي له تقريبا شهر الحين فطوم وهي تغمز لي : مافيه بيبي بالطريق حمر وجهي لو تدرين يا فطوم توني مالي إلا سبوع من صرت انا وعامر أزواج مثل العالم والناس نوره : لا تو الناس فطوم : أي والله لاحقة على عوار الراس ترى في البداية قبل ما يجون العيال وانتي في عيونه والي تقولينه ينفذة وكل اوامرك مطاعة ومن يجون البزران سكتي اولادك ازعجوني اولادك ما كأنا اولادي هم اولادة قلت له خلاص اذا ولدت راح اكل حبوب منع الحمل لمدة ست سنوات ابيهم يكبروا شوي منور : مشاء الله وهو ما يضيع وقت كل سنه بزر نوره : ههههههههههههههههههه اذكري الله منور فطوم : منور لا تحسدين اطفالي منور : لا مراح احسدك يا شيخه راح الوقت وحنا نسولف مع فطوم وجا الوقت الظهر وراحت لبيتها وما طاعتنا كنا نبيها تتغدا عندنا بس قالت زوجها وراها وانا مشتاقة لهلها وتبي تقعد معهم اطول وقت ممكن قبل ترجع لجيزان نوره : يالله انا بعد بروح لبيتي منيرة : ليش حرام عليك وجلس انا بلحالي ما غير اطاق مع رشود وشوي مع عزوز نوره : وش اسوي عامر وراي ان شاءلله العصر اجيك منيره : اوف الله يعيني يارب نوره : الله يوفقك يارب عشان تشغلين وقتك منور : امين نوره : هههههههههههههههه لا وامين مابه سحى منور : وش اسوي ابي اكون مصدر اهتمام احد كل الي في البيت يهاوشوني على الأقل ابي احد يحبني نوره : خلاص بتكونين من نصيب حمد اللهم احفظ المسلمين من بين أيديهم ومن خلفهم وعن أيمانهم وعن شمائلهم ومن فوقهم ومن تحتهم اللهم لاتمتني حتى أرى نصر المسلمين وعزهم |
|
| |
|
2010-07-31, 03:50 PM
| #53 (permalink) |
| ربي سألتك جنةعرض الفضاء() تاريخ التسجيل: Jun 2009
المشاركات: 5,456
معدل تقييم المستوى: 744 | نوره : اقول لو اتم معك شوي ما بقى عندي حسنات خفي من الحكي في العالم منور : ستغفر الله قولي كفارة المجلس ويروح كل ذنوبك نوره : يا بعد قلبي كفارة المجلس بس يسقط حق الله لكن حق العبد لا يسقط منور : اقول روحي غثيتيني الله يعيني اجل تلقين خلق الله كلهم في رقبتي نوره : يالله فمان الله طلعت من البيت وطبعا امي وجدتي كانوا عند وحده من جيرانهم مدري ليش امي وجدتي بحبون يزرون جيرانهم عكس خالتي ام عامر دايم تحب تجلس بالبيت جيت بفتح باب الشارع ونصدمت يوم شفت سالم بوجهي توي ما نزلت الغطوه على عيوني عطيتيه جني سالم : السلام عليكم نوره : وعليكم السلام ارتبكت شوفة سالم اربكتني حاولت ما انظر له بالعين الي كنت اشوفه بها بس غصب أي شخص كنتي تحبينه وتحلمين تعيشين معه وتفكرين فيه كل وقت لابد اذا شفتيه تحسين بحنين له بحساس غريب محد راح يحس فيه الا الي مجربة سالم : شلونك يا نوره عرفني نوره : الحمدلله شلونك انت كان اسلوبي معه رسمي سالم : بخير راشد موجود كأنه حس من نبرة صوتي اني مابي اعطيه وجه لكن الصدمة يوم شفت عامر وراه انصدمت حاولت اكون طبيعية نوره : لا راشد طالع من الصباح بدري للصناعية مدري ليش قلت له كذا ابي عامر يسمع ابي ما يشك بشي لكن الي شفته ان وجه عامر صاير اسود مره التفت سالم وشافه وسلم عليه سلام بارد وتركه وراح تكلمت ابي اوخر الإحراج نوره : جيت توني بروح الحين كان ساكت ماحبيت سكوته نوره : ورب البيت يا عامر مو مثل ما انت متخيل يوم جيت بطلع شفت سالم وجيت انت على طول شفته يتنهد ويتعوذ من الشيطان مشى قدامي ولا قال ولا كلمة ودخل البيت رحت لأول مره اخلي الغدا على الشغالة ودخلت غرفتي وحطيت عبايتي وجيت طالعه لقيت عامر طلع يوم اذن الظهر ورجعت اصلي الظهر وبديت اجهز السفرة وارتبها لحد ما يجي عمي ونحط الغدا تقريبا صارت الساعه وحده وكان عامر يلعب بمفاتيحه وساكت وكنت انا وخالتي نسولف وهو مستمع لنا وجا عمي وحطيت الغدا وتغدوا وانا ما تهنيت بالغدا لاني شفت عامر ما تغدا كان بس اسم انه جالس على السفره يوم شفته راح للغرفة تبعته وغسلت أيدي لقيته متمدد على السرير وحاط يدينه على عيونه جيت جنبه يوم حس بي عطاني ظهره لكن كنت مصممة على الي في خاطري تقربت منه وقربت عند اذنه وصرت اقولة بسلوب هادي : عامر ما رد علي ولا قالي ولا كلمة لكن انا مصممة ما ينام وهو زعلان علي صرت احركه بشويش : يالله عاد لا تزعل حلفت لك بلي خلقني وخلقك انه ما صار بينا شي كان يسئل عن راشد بس وبعد ما رد علي قربت اكثر منه وحطيت ذقني على ايده من فوق ونصدمت يوم سحبني له وضمني له بقوة وقال : نوره ترى ما اتحمل اشوفك واقفة معه اذا شفتيه روحي لأي مكان ثاني لا تردين عليه ما خلاني اقدر ارد عليه كانه خايف اني اروح منه سامعه يا نوره نوره : ابشر ولا يهمك دفني وهو يضحك : ما تهنيت بغداي ضحكت : هههه يالله قوم بروح اجيب لك غدا عامر : أي الحين انفتحت نفسي رحت وجبت له غدا وحطيته بصينية وجيت عامر : تغدي معي نوره : اكيد بتغدا اصلن ماتهنيت بغداي وانا اشوفك ما كليت قعد يناظرني وهو يبتسم : الله لا يخليني منك نوره : ما قالك رشود شي عامر : هههههههههههههه إلا مزعجنا يبي يعرس نوره : منور زعلانه تقول ان العرس بيلهيها عن المذاكرة عامر : وهي وش دخلها المفروض ساره الي تعترض نوره : ههههههههههههههههههههه أي تفكر بفستانها عامر وهو يبتسم : وانتي ما تبين تفكرين بفستانك نوره : لا أنا ما يهمني والحمدلله ما اقعد احاتي وربي يسر لي اذا رحت للسوق على طول القى عامر : لا يا عمري قولي كل شي علي حلو نوره : هههههههه الله يحلي ايامك حسيت براحه صراحه يوم شفت عامر يتغدا ونسى موضوع سالم الله يعيني يارب صدق الرجاجيل مثل البزران لازم الواحد يراضيهم ويراعي مشاعرهم عامر : نوره وش رايك نروح نتمشى العصر تغيرت ملامحي تذكرت اني مواعدة منور عامر : وش فيك نوره : منور ضايق صدرها من زمان ما جيتهم عامر : عادي اتمشى انا وانتي ونعزمهم على العشا هي وراشد وعزوز وش رايك نوره : خلاص الي تشوفه ========================================== منور : قسم بالله اخوك مجنون وبيروحنا كلنا في ستين داهيه نوره : ههههههههههههههههههههههههههههههههههههه كان عامر جنبي ويبي يدري وش منور تقولي ماعاد قدرت ارد عليها ولا قدرت افهم عامر سكرت منها عامر وهو يبتسم لي : عسى دوم ذا الضحكة وش فيك نوره : صح راشد يوم درى انا عازمينهم للعشا الا قال كلمي ساره وقلي لها حنا بنروح للملاهي عشان تجي ويروح الحبيب يتعشى معها بروحهم ومنور تقول لو تموت قال حنا بنكون في مطعم واحد وتقوله منور استئذن من سعد أخوها فرضا لو قدر الله يصير علينا حادث شي او يحترق المطعم وش بنقول على الأقل انك مستئذن ومهدد منور لو سعد راح يرفض يخليها تروح معهم لا يحرمها من الطلعه وهي شابه ضو عامر : ههههههههههههههههههه راشد رهيب ما همه احد نوره : تصدق عاد ما توقعت راشد كذا كان هو وساره توم وجيري عامر : يا بنت الحلال يموت فيها مزعجني اذا تصل علي قالت قلت قلت له يا شيخ انت تحبها تدرين وش قال نوره وهي تبتسم : وش قال عامر : اقول اذوب في هواها نوره : سبحان الله ابن الذينا وقاعد يلعب علينا وكأنه يكرها وهي البنت بتموت من القهر عامر : ههههههههههههه يغطي على حبه نوره : الله يوفقهم يارب متحمسه اشوف وش بيكون رد سعد تتوقع راح يوافق يخليها او لا وانتو تتوقعون راح يخليها سعد تروح معهم اللهم احفظ المسلمين من بين أيديهم ومن خلفهم وعن أيمانهم وعن شمائلهم ومن فوقهم ومن تحتهم اللهم لاتمتني حتى أرى نصر المسلمين وعزهم |
|
| |
|
2010-07-31, 03:51 PM
| #54 (permalink) |
| ربي سألتك جنةعرض الفضاء() تاريخ التسجيل: Jun 2009
المشاركات: 5,456
معدل تقييم المستوى: 744 | الجزء الثامن عشر راشد : اي وش يهمك عامر وجنبك انا المسكين الي ارحم عامر : ياخي قل مشاءلله ترى العين حق راشد : ياليت عيني حاره ابيكم تذقون شوي من الي مذوقني أياه سعيدان يعني انا بخطف اخته وانتو اثنين احترمو مشاعري شوي وش تتصاصرون فيه عامر : ياحول يا النشبه زوج وزوجته وش مدخلك بينهم انحرجت مره راشد : لا زوج وزوجته اقول قم قم من جنب اختي عامر : دا بعدك نوره : اقول قصرو اصواتكم فضحتونا راشد : عزيز ومنير وين راحوا نوره : يقولون بنلحقكم راشد : ترا اعرف حركات عزوز تلقينه هو منور يفرون فر بالشوارع سبحان الله مدري كيف العالم تتمشى عامر : وش في العالم الناس اليوم مو معجبينك راشد : لا بس انا انسان اذا جيت اتمشى ما احب افتر في السيارة احب اروح لمكان هادي اجلس اتقهوى اسولف اما التمشية بالسيارة هذي ما تعجبني نوره : الله ويوم كنت تتمشى مع سارونه في البر راشد : لاااا سارونه غير والتمشيه معها غير حتى لو بأرض مقفرة تصير كلها زهور نوره : اقول ما كن بس منيرة وعبد العزيز تأخروا يريحونا من الصدعه الي معنا عامر وهو يقرب مني اكثر : أي والله صدعه ما خلاني اخذ راحتي وقف راشد وجا يما عامر : علي الحرام ان تقوم من جنبها نوره وعامر : هههههههههههههههههههههههههه عامر : الله يا خذ شياطينك ليش تحرم جا راشد وجلس في مكان عامر : تستاهل اجل ما فيه مراعه للمشاعر عبد العزيز : السلام عليكم الكل : وعليكم االسلام جتني منور وجلست جنبي راشد : اقول وش أخركم عزوز : لقينا محل جنبكم اكسسورات وصجتني منور الا تنزل تشوفه تقول ابي اشتري عشان عرس راشد راشد : لاا اذا عشان عرسي اخذي راحتك الكل : هههههههههههههههههههههههههههههههه نوره : الحين تشترين اكسسوار قبل الفستان منور : قصري صوتك وش اسوي تمويه شفته وعجبني حاجات فيه تهبل ومميز وينا عنه صراحه تحفة والله استئذن منا عامر وراح عزوز : يا بو الشباب اشوف سعد رفض يجيب الخطيبة نوره : ههههههههههههههههههههه لا تذكرة ما صدقنا على الله ينسى راشد : وش اسوي حكم القوي وكمل ببتسامة وش رايكم اروح اخطفها منور : الظاهر الايام هذي تتابع سبيس تون نوره وعزوز : هههههههههههههههههههههههههههههههه راشد : اقول منو كلمك انتي او جا يمك يعني تنكتين حضرتك منور : لا احاول راشد : اقول انثبري جا عامر وجلس معنا : هاه وش تبون عشاكم عزوز : تبون الحق وش رايكم ناخذ عشانا وفيه طريق بين الرياض والخرج منطقة هناك بريه نجلس فيه ونسمر لأخر الليل أفضل من المطاعم راشد : خوووش اقتراح عامر : يالله على بركة الله نوره : حسافة لو دارين من زمان سوينا قهوة وشاهي عامر : ما يحتاج مو حزة قهوة يالله امشو عشان يمدينا نوصل اليوم عاد قمرا راشد : يالله توكلنا على الله ....: على وين عامر : هلاااا والله بسعد سعد : ههههههههههههههههه هلا بك زود سعد : ههههههههههه راشد وش فيك معصب عامر : خله الحين عيونه على الي وراك سعد : اخباركم اخباركم يا بنات نوره : بخير الله يسلمك وين نجود ما جت معك سعد : نجود تعذر منكم لو ما ازعجتني ساره ما جيتكم راشد : ياخي حرام تعذب قلوب سعد : ههههههههههههههههه لا تفرح ما تبيك انت تبي البنات راشد : عادي مو مهم اهم شي نشوفها سعد : اقول الاخو احترم وجودي وين بتروحون عامر : عبد العزيز اقترح علينا اقتراح نشيل عشانا سفري ونروح على طريق الخرج سعد : خلاص يالله نمشي عشان ما نتأخر كنا نضحك على اخوي راشد الرجال مقرب من ساره وماسك يدها ويسولف معها بصوت قصير ما نسمعه وسعد مو يمهم والي زاد ضحكنا يوم شافه سعد ودفه سعد : اقول يابو الشباب ماكنك زودتها شوي راشد : لا حول يابن الحلال تراها زوجتي سعد : بس ناقص شرط واحد الإشهار راشد : اقول امشوا قبل اخطفها الحين وروح معها واتحدى اذا احد سوى شي سعد : أي عشان نقلبها حلبة مصارعه الكل : هههههههههههههههههههههههه عامر : اقول اسبقونا وحنا بتلحقكم بالعشا الكل : يالله راشد : اقول عامر ترا بناخذ نوره معنا عامر : لا اسمحلي نوره مقدر استغني عنها حسيت بالاحراج خاصة قدام سعد وتعليقات البنات الخفيه راشد : اقول سعد وش رايك اخذ منك ساره سعد : لا تحاول راحو وجلست انا وعامر نضحك على راشد عامر : دقايق بروح اطلب العشا ورجع راح عامر وقعدت أتعبث بسيارته وفتش الإدراج شفت شي مغلف عامر : لحظة لحظة خليها مشاءلله عليك تفتشين نوره : ليش خايف اني اشوفها عامر : أي هذي هدية خويتي وطحتي فيها صديت على الدريشة اناظر على برى صح اني ما احبه بس تضايقت اكيد كل مره غيري بتتضايق مو مسئلة حب قرب مني ومسك ايدي وانا مالتفت عليه وحاول اسحب يدي عامر : شوفيني نوره : اوف وش تبي مني روح لخويتك ودني لهلي قبل عامر : ههههههههههههههههههههه لا والله لا يا قلب عامر مراح اوديك وبجيب خويتي بعد تسهر معنا التفت عليه بعصبيه : لا والله عشان اذبحك وذبحها عامر : ههههههههههههههههههههه ياختي انتي متوحشة عكس شكلك او عشانك تربية بدو نوره : والنعم بالبدو عامر : والنعم والنعم يابوك احد قالك اني ماني بدوي ورد يقولي : حرقتي مفاجأتي ناوي اهديك أياها بالليل اذا رجعنا التفت عليه فيه طاري هديه قعدت اناظره عامر : صدق حريم دايم مستعجلات في الحكم نوره : الاستعجال بالحكم علينا كلنا مو بس الحريم جلس يناظرني وما تكلم قعدت اناظره سرحت في عيونه وكيف فيها شي يشع ونظراته خلتني اغوص فيها وابتسم غصب حسيت بحساس حلو شعور غريب في قلبي فرحة خفية يمكن احد منكم جربها قعدت اطالعه وادقق في تفاصيل وجهة مد يدة عامر وحط يدة على خدي فوق البرقع الإسلامي كنا بعالم ثاني نسينا وين حنا فيه وخرب علينا الهندي يوم طق الدريشه عامر : حسبي الله عليك نوره : ههههههههههههههههههههههه عامر ببتسامة : فرحانة ما صدقتي على الله انا اوريك خلينا نروح لبيتنا نوره : ههههههههههههههههههههه ما عرفت ارد عليه قعدت اضحك من جد احس بفرحة غريبة احس براحه أي راحة عجيبة عامر : يا علها دوم هالضحكة خذينا العشا ومشينا لهم ولقيناهم قدامنا يحترونا قدام نقطة التفتيش مثل ما اتفقنا مشينا تقريبا مسافة ربع ساعه وفرشنا فرشة كانت مع الأخ راشد دايم الأخو راعي طلعات واغراضة بسيارته حتى ذرى سوينا ذرى عشان نسمة هواء بارده وجمعو الشباب حطب وشعلو نار وفرشنا عندهم سفرة وحطينا عشاهم وحنا جينا ورى سيارة وسوينا سفرتنا ساره : يالله يا راشد احراج بغيت اموت احراج من سعد نوره : ههههههههه سبحان مغير الأحوال هذا راشد إلي ما تطبين بيتنا عشانه ساره : نوروه تذكرين معاملته لي هو الي خلاني اسوي كذا نوره : عاد لو تدرين عامر وش يقولي ساره متحمسه وتدخل منور بالعرض : وش يقول ساره : وانتي وش لقفك منور : الحين انتي وياها عشان كل وحده منكم متزوجة ترفعون روسكم علي ساره : كملي ما عليك منها منور : يارب يا كريم ما يجي الشهر الجاي الا وأنا متملكه نوره : وساره : ههههههههههههههههههههههههههههههه امين ساره : منور تكفين اصبري خليها تعلمني وش قال عني نوره : يقول لعامر انه يموت فيك وانه يتعمد يسوي كذا عشان يغطي على حبه منور : امحق تعبير نوره :هههههههههههههههههههههههههه ساره : اقولي احترمي نفسك ترى ما ارضى على رشود راشد : فديت الي ما ترضى على رشود شرقت ساره وعطيناها ماء راشد : هههههههههههههههههههههههه بسم الله عليك يا بنت الحلال انتبهي على عمرك ترى ورانا زواج ادري اني انسان محبوب وانحب والكل يموت فيني اللهم احفظ المسلمين من بين أيديهم ومن خلفهم وعن أيمانهم وعن شمائلهم ومن فوقهم ومن تحتهم اللهم لاتمتني حتى أرى نصر المسلمين وعزهم |
|
| |
|
2010-07-31, 03:52 PM
| #55 (permalink) |
| ربي سألتك جنةعرض الفضاء() تاريخ التسجيل: Jun 2009
المشاركات: 5,456
معدل تقييم المستوى: 744 | قرب راشد وجلس جنبها : قوليها مره ثانيه يعني انا ما انحب ساره : ا .أأ . أي ما تنحب راشد ومنور ونوره : هههههههههههههههههههههههههه نوره : حرام عليك اربكت البنت ساره : الحين تضحكون علي راشد : يخسون نوره : راشد ترى ما تعشينا اذا انت شبعت ترا حنا ما شبعنا راشد : عادي بتعشى معكم يوم شفت ساره انفتحت نفسي سوسو اكليني نوره ومنور : هههههههههههههههههههههههههه ساره ساكته منحرجة راشد : يالله عاد اكليني مشتهي لقمة من ايدك ما كنا فعلن متوقعين ان ساره بتأكل راشد اخذت قطعة صغيرة من المشاوي واكلت راشد راشد : آآآآآهـ ورب الكون احلى لقمة ذقتها نوره : لاحول لا تحلف بالله وانت نصاب راشد : ومن قال نصاب واخذ قطعه صغيرة : يالله دوري اوكلك افتحي فمك ساره بحراج : لالا مابي راشد : افا والله ما تبين من يدي ساره : لا مو كذا راشد : اجل افتحي فمك فتحت ساره فمها وانا ومنور نراقبها ونضحك راح راشد وخلانا ناكل ونعلق على ساره الي ما عاد كلت زين وكل شوي تسرح وتعلق عليها منور عامر : نوره نوره نوره : لبيه عامر : لبيتي في منى اذا خلصتو من العشا تعال عندنا نسهر على الضو معناها "النار" نوره : ابشر رحنا للشباب وكان الجو حلو صراحه السماء شلون اوصفها تقدرون تقولون بيضاء شفافه مره من اشعه الشمس الي مسلطة على القمر وطالع شكل القمر خياااال كنا نقدر نطالع كل شي واضح كأنا مولعين سبحان الله لمبة من ضوء القمر والنار حاطينها قدامهم بعيده شوي ويجينا دفاها وفارشين فرشتين كبار فرشة جالسين هم عليها وحنا جينا وجلسنا على فرشة الثانية راشد : خلونا نقول الغاز ونشوف الاذكياء عزوز : ما يحتاج انا أذكاكم راشد : اقول بدى لعب البزران عامر : لاحول قول لغزك الحين عشان نحكم سعد : ما يحتاج بحله انا راشد : بدى كل واحد يتفلسف علينا وفعلا قعدوا الشباب يقولون الغاز ويتهاوشون ومره يعرفون يحلونه ومره يتهاوشون يقولون الحل غلط ما يمت للغز بصلة لحد ما قال عامر عامر : اقول خلونا نقول ابيات شعر وآخر حرف يبدى فيه الثاني راشد : قبل تبدون انا هندي قصيدة وابي اهديها عزوز : شكرا شكرا ادري لي راشد : لا للقمر الي هناك كلنا : هههههههههههههههههههههههههه وساره ماتت من الحيا يا نجم عمري العالي** لي في السما مجراك الليل كل ما طالي ** يحلا السهروياك إنته الونيس الغالي**او لي يحلو إمناجاك مِنك القرب يهنا لي**وافرح انا إبلاماك او فرقاك لي من طالي ** غث الحشا فرقاك لك ادعيواسالي ** رب الملا يحماك عن حاسد أو عذالي**او عن لي إيكدر ماك ياروحي يا حلالي ** كل العمر يفداك ما ظنتي يحلالي ** وقتي اناابلياك بتهون الأعلالي ** لو تنظر إل مضناك القلب صوبك حالي ** حل اوسكن في احماك لك اقرب في خيالي ** لو شحت في منحاك لو تطلبني المحالي**جبته فدا عيناك الكل : هههههههههههههههههههههههههههه عامر :يالله خلونا نبدى عامر : يالله انا أول واحد يا صاحبي عسى البشر من فداياك وعسى الزمن يا غايتي مايضرك = البعد ما يبعد قلوب تمناك مدام فيها يا حبيبي مقرك عامر : دور سعد سعد : اصبرو ادور بيت أي تذكرت كل ماقالو لفا الديرهغريبقمت أومي في يديني وابتهلهيه يالمقبل هلابكيالحبيـــب مرحبا وأهليـــــن ياحي الرجل وإن تــــبين لا صحيب ولاقريب أبكي ضيقة أبكي حره وأنفشل عبد العزيز : خلوها انا بالقصيد مافيه مثلي راشد : اقول اخلص علينا الكل : هههههههههههههههههههههههههههههههه عبد العزيز : لمنيفي محجر عيونك حبيبيوخلني خلنياشوف نفسيفي عيونك واطمئن راشد : يا خي جايبين لي اصعب حرف عامر : انت ياخي ما ينعرف لك مزعجنا كل شوي موال راشد : خلاص جاني الالهام عزوز : يسرق ويقول الهام راشد : ياخي التذكر بعد الهام اني اتذكر ابيات يعتبر الهام عزوز : الهام سرقة الكل : هههههههههههههههههه راشد : أي خلوني عاد اقول نور الدنيا ودي أقول له اللي بيني وبينه كان أحلام كان غرام ما وديانسا شوقي له روحي لهكلي له وشلون ابنسى نور الايام وينهليته يدريعن اللي بين قلبي وبينه الكل : هههههههههههههههههههههههه راشد : الحين ما اعجبك بيتي اقول سارونه وش رايك فيه سعد: لا حول يبي يحرج اختي اقول عامر من وقف الدور عنده عامر : عند نوره نوره : هــانــت ولـو الـوقـت دايـم لـه احـكام ....بـعـد الـتعـب يا اخـوك نلـقى فــرجها يـرجـع ورى واقــول يـا وقـت قــــدام.......دنـيـا عـسى الـلـه يـكافـيـنا حـرجـها عزوز : من يمدح العروس عامر : يالله حرف الالف راشد : لا مابي احد يسمع صوت ساره بالقصيد هذا لي بس عامر : اقول انهاوها خلونا نسولف الاخو بيخرب كل للعبة نلعبها سعد : شكلي بهون منه طلع مو رجال راكد راشد : تهون عشان اقدم اعتراض ورفع عليك قضية كانت سهره ولا حلى كلها ضحك وسوالف حسيت اني من زمان ما استانست كثر هاليوم اتمنى تعجبكم المفاجأة اللهم احفظ المسلمين من بين أيديهم ومن خلفهم وعن أيمانهم وعن شمائلهم ومن فوقهم ومن تحتهم اللهم لاتمتني حتى أرى نصر المسلمين وعزهم |
|
| |
|
| مواقع النشر (المفضلة) |
| الكلمات الدلالية (Tags) |
| الشوق, الطين, بيتنا, بقلم, رواية, غيوم |
| أدوات الموضوع | إبحث في الموضوع |
| انواع عرض الموضوع | |
|
|
المواضيع المتشابهه للموضوع: رواية بيتنا الطين بقلم: غيوم الشوق . | ||||
| الموضوع | كاتب الموضوع | المنتدى | مشاركات | آخر مشاركة |
| رواية اخرج منها ياملعون بقلم الرئيس الأديب صدام حسين | وللسعادة معنى | منتدى منبع الروايه | 28 | 2010-07-29 01:42 PM |
| باب بيتنا من خشب وباب بيتكم من زجاج | T0o0Fe | الديكور والأثاث المنزلي | 12 | 2010-06-24 03:09 AM |
| غيوم ...صور للتصاميم ... | بقايا أمل | جرافيكس والتصاميم | 4 | 2009-05-12 06:56 PM |
| على ذاك الجدار اللي على حد البيوت الطين | شموخ آنثى | الشعر وأبيات القصيد | 8 | 2008-12-29 07:51 PM |
Sitemap
الساعة الآن 07:20 AM. 
Copyright © االمنطقة الشرقية Powered by vBulletin® Copyright ©2000 - 2023, Jelsoft Enterprises Ltd.
Search Engine Optimization by vBSEO 3.6.066a66.com
::..:: منتديات ::..::
 |  |
العرض العادي
