| | |
لاشتراك فى مجموعة قروب خليجيات
فى صندوق التسجيل ضع أميلك بشكل صحيح ثم اضغط على اشتراك
| |||||||
 |
| | LinkBack | أدوات الموضوع | إبحث في الموضوع | انواع عرض الموضوع |
2009-03-11, 12:46 PM
| #1 (permalink) |
| من كبار الاعضاء  تاريخ التسجيل: Oct 2008 الدولة: مدينة الجبيل الصناعية
المشاركات: 5,541
معدل تقييم المستوى: 767   |  ,,, يا ليل التجافي وشلون قحطه يمشي حافي؟,,, الموضوع أهداء للدحمي فديته هو وكل خبي وخبيه بهذه الحياة الدنيا ****************** مع حماس هذا الشتاء المقفر ومع كثر المشوق في الفيس والمناطق الاستوائية انحش عنها لا يجيها مشق انصحكم يا عيال بجاسوليد تراه زين للاتهاب المفاصل والاغراض  اولا قبل تبدأ عزيزي القاريء في قراءة هذا الكم من الهذرة الفاضية الماصله اللي مالها من الصح طريج كلها خطأ اكسات ×× لازم تحضر التالي قوطي زبادي المراعي منهي الصلاحية عشان تفقد وتدخل الجو مزبوط بريال خبز ابيض علبة عصير الربيع بردقان وان كان بوه منجو مابوه خلاف واحد كرتون بسكوت ابو ميزان معتق مخزنه ابوك للتراث وبسم الله نبدأ *************** في ريعان الشباب وحين يبزغ نور التريك في الحوش مساء احد الليالي << أنتبهو ترى الحجر حق التريك هو حجر ابو قطو الاحمر والازرق تبدأ انامل حسون السنسون بطل فلمنا المدبلج بأستكشاف حوشهم بكل دقه وتفصيل وحال خشمه يقول لا تعلقنا فيك يا تنزل الركاب يا تخلينا داخلين لا تعلقنا ابد كان حسون رضي الله عنه واصلح باله صاحب الحادي عشر ربيعا وثنين خريف واحد صيف كثر شطه <<< ورى ما تاكل تبن وتكمل كان حسون يتمقل عالمه ويسرح في افكاره الشارده تقول قطاوة ملحوقين يفكر ويتأمل حالته المأسوية في نهاية العام الدراسي كان كل طموح حسون بن سنسون مجرد اشياء لا معنى لها في عالم الكووبار الفحول الزاحفين الشنبات العضلات كان دائما ينام وفكره سارح في كمبيوتر العائلة اللي شافه بالحراج يوم ابوه رايح يشتري صخانه مستعمله عشان يمشي فيها وضعه لاخر الشهر حسون كان يعافر مع ابوه بالحراج وشاف كرتون كمبيوتر العائله والكل منا يعرف ان ذاك الكرتون يا ما سوى لنا هوس ومصايب كنا دائما اذا شفنا صورة رامبو ولا السلاحف ولا كاتبن ماجد على الكرتون تجن جنونا وودنا ان الوالد يحن علينا ويشتري لنا الكمبيوتر <<< ايييه ياما لوع كبدي كمبيوتر صخر ما فيه ولا شريط بس التاريخ بالهجري والميلادي وكل التواريخ اذا علق يحطها مولد الرسول  المهم حسون الله يحفظه كان منسدح فوق سريره وان ما خاب ظني ما هقيته سرير دام ابوه رايح سوق الحراج يدور صخانه رخيصه خوفتي فارشين له مطرح ولحاف صوف ابو غزال <<< الله يرحم ايامك يا شيخ  الزبده ان حسون رقد ذاك اليوم واصبعه بخشمه يبرم من كثر التفكير والهاجس خايف بكرى اذا جاب الشهاده وفيها طماطه امه تحبه وابوه يطقه  والكمبيوتر اغسل يدك ما فيش ولا عليك امر تشبك لك مع عيال الحارة يلعبونك ولا ارجع على الكيرم  اللي وارثه من جده منقاش التاسع عشرقام الصباح اللي هو صباح الشهادات ايييييييه يا ذاك الصباح كان ربكه للجميع الكل تنزل عليه نفاضه وحالته حاله يتخزبق يبي يمسك جادة المدرسة يروح لجادة المخبز المهم حسون ارتز من فجرية رب العالمين صاير هاك اليوم عاقل قام وغسل فيسه وراح يسقي الزرع وحال قلبه يقول <<< تجملو يا الاجاويد (سامري يرقع بقلبه من الخوف ) دقت الساعه ثمان شال حسون شليله عض ثوبه البني اللي مسبقا كان ناصع البياض وحاليا مالك امل يرجع صاطع كووليش وطيران للمدرسة وكان الفديو كليب راكب عليه بالخيال مثل افلام كرتون غيمه فوق راسه يشخمط عليها احلامه هع هع ابو فطره يناقز وهو يناقز معه القير الاحمر والمحول كانو صديقين دربه للمدرسة وهم بنات حبل مدري حبل بنات مدري بنات خالة ام جدة افكاره والله وكيلكم جاه بليس ابو رمح احمر نقز بخشته يقوله لن يشتري لك ابوك كمبيوترن ايه المغفل الصطل سوف يربطك بالنخله اليوم لان عليك ثنين طماطس وبطاطس وخسس سجل على الحساب لأخر الشهر لان راتب ابوك ما نزل << حتى بالخيال ما نزل ؟ شوي ويجيه ذاك اللي حاط فوق راسه عقال ذهبي من فوق يقوله لا عليك يا حسون دامك قمت اليوم وغسلت وجهك اللي ما عمره انغسل وكان بخاطري تموصه بالفيري عشان يروح الشهابه اللي فيه صدقني يا حسون ابوك راح يرضى عنك واكيد بيقولك انه راح يجيب لك هدية وشكلها كورة ام عشره  تحطم حسون وراح مطأطأ الرأس للمدرس وتعرفون المدرسين تجيهم حركات حقاره ايام الشهادات يقعدون ينادون اسمك ويقزونك بنص عين ويخوفونك وانت تبدى تدريجياً تبرطم ثم تنزل دمعه ساكنه تحرك الوجدان الفاشل ثم تنهلها صيحه ثم يضحك المدرس ضحكه شريره يقول مالت عليك ناجح وتصيح وانت بدون شعور تكمل الصياح البريء اااااااااااااااااه يا ايام صف سادس كانت ايام حزينه <<< الله يلعنك يا استاذ عزوني يا ابو مصاصه يا العوج كم مره دبغتن اخذ حسن شهادته وجاك طاير للبيت فدع الباب حق الشارع وجاك الباب مجاوب على وجهه <<< اتوقع ابوه شاريه من المحرقه يقزر الحال لين ينزل الراتب >>> ابوك يا راتب ذلنا وعجز ينزل  المهم بشر امه واللي خلفوه ومضت حياتهم سعيده شرى له ابوه الكمبيوتر بعد ما نزل الراتب اخيراً وقضى حياته المتبقية بسعادة وهناء توته توته خلصت الحتوته <<<< اقول كمل لا افقع راسك بذا البياله  المهم حسون راعي الحدعش ربيع بدون طرشي كان تقريبا حسب ما لمحت لكم بالصف السادس مضى عطلته ذيك في اخر حياته الطفولية لعب كمبيوتر وكل عصرية كان طموحه انه يقردن الوالده عشان تأمن له ريالين حق العسكريم والحلاو اكيد ما راح يخذ غيرهم لانه يبقى بزر ما بلغ خلصت الاجازة الصيفيه وامه اكيد راحت للحياة بلازا بتتقضى له ولاخوانه اقلام ومساطر وبريات ومساحات من وين طبعاً اكيد من رامز خبركم الله يديم الرخص اثر امه شرت له قلم ميكي موس وشغلات سيارات مشى الوضع ايزي لان حسون ما كان يعرف شي عن المرحله المقبله الا وهي مرحلة الصداع ووجع الراس وابراز الشخصية بين قوسين ( مرحلة المراهقة ) اهم تفاصيل تلك المرحله 1-اكتشاف المستخبي 2-تنفص الخشم لين يصير كنه غطى فقس 3-ظهور طحالب صفراء اللون وحفر وردميات بالوجه << بالضبط مثل محاسن شارع ابو ميه قبل التعديل 4-اسمرار الصبغة تبع الفيس 5-الصوت يصير حرش كنه صوت واحد سكران 6-لا تقولون لي بزر تراي رجال 7-تغيير اللوك الطفولي الى لوك اخر سنتطرق له لاحقاً لما حسون راح المدرسه في اول يوم له دراسي بالمتوسطه يحسب الوضع ايزي تكت اذا رن الجرس بالفسحه يروح مشوت للمقصف عشان يحجز له زعتر وعصير واذا جات الحصه السادسه حط شنطته العلاقي فوق كتفه <<< اكيد شنطة ابطال الديجتل وفي الطابور صباحا عقب ما يقولون سارعي للمجد والعلياء بيقولون بالاخير للعلم والوطن طن ططن <<< ركزولي بالله على طن ططن الحياة جديدة عليه ما يعرف حتى اسمها غير انه بيرجع مثل البزر ابو 6 شهور يسمع ويحفظ عادي جداً اول نقطة بيلاحظ الفرق بين المتوسط والابتدائي ان المدرس ما يقول يا شطار هذي تعطيه اول شرارة دفعة معنوية نحو النهوض للعالم الكبير اذا طلع للفسحه الوضع ما فيه صراخ وازعاج مثل روضة الاطفال اوضع اكبر بكثير يشوف واحد نابت بوجهه شعر وعيال داشرين طاقين بنت البكار وهذي على فكره برفقها لكم لاحقاً بالصور واذا جاء حسون مقلع للمقصف ما يشوف مثل الابتدائية مدرس واقف ومعه عصى ما يشوف الا البقس والضرب والمضارب اكيد ساعتها بيقمط العافيه وبيصير مؤدب لمدة اسبوع لين يتعود على الوضع بعد ما اخذ حسون الزعتر والعصير اكيد انه ابو نص خبركم راتب ابوه للحين ما نزل يتوجه دوغري للكراسي بتاع الاكل ولا يقرده الا الا يجلس عند شلة دشير من صف ثالس متوسط <<< ادوخ على ثالس عاد ذيك المرحله يشوفون حسون وبشكته كلهم مبزره توهم جايين من الابتدائي هع هع ويبدى التحفيل على حسون خصوصا ان خشمه اللي توه منتفخ يعطي مجال للسنسون انه ياخذ حريته بالتمشي داخل الخشم <<< ورى ما تاكل تبن الا الان حسون متقبل الوضع ومطنش خايف ينفت ويتجمعون عليه الشله على الهده خصوصا انه توه في اول يوم وماهب في خاطره التسحيب على الزفلت هع هع راحت الحصص حصه ورى حصه ورى رقيه ورى مزنه يا لبى قلبك يا مزنه يا بنت جيرانا يا جعلي اغدي لك كتب كلية اداب وتشيليني يا ليتني البرقع اللي يجنني كل صبحية وتلبسيني يا ليتني هندي الباص واقزك من المراية كل يوم معذب روحي ومقطع تواير الموستنق عند باب بيتكم ولا يجيني الا بيالة ولا ريموت من ابوك يشق بدي موتري ابوك ذا قحطه يوم من الايام بلعن خيره بعلقه بالكفر اللي ورى وبسوي عليه حركة واقف اخليه يرجع لامك ذا المتينه يرجع لها لحم مفروم ولا اااااااااااه ماحد ملوع كبدي الا اخوك الدحمي صايرن نزر مثل امك من احد يقوله شي زعل خيشة الفسو مزمز ليتك تقرين اللي اكتبه البلا ما هقيت ابوك يحط لكم نت زين منه يسدد فاتورة الماء اللي مفلس فيكم على النخلتين اللي قدام بيتكم مزووووون يا جعلي افدى خشمتس وما حوى من نقاف وسناسين كم احسد حبة الخال اللي جنب عينك مزووون قسم كثيرات لي شهر مانيب انام كله اتحلم اني خدامتكم واقزقز فيك يلعن ابو الشيب شلون يحرمنا موزي << يع ما يركب مزنااااه ويخب تذكرين يوم كنا صغار نلعب الملك والملكه يا لبى الملكه اللي خشتها مليانه عسكريم توت كنها قطو سيامي صدق كنت احفل فيك ومخليك مصخره انتي وشعرتس اللي كنه اسلاك كهرب لكن ما عليه قابل فيك ما علي منك المهر 30 الف بدون مؤخر والشقه معصي تنثبرين في عشة الحمام اللي فوق اكمها بشينكو واحط فتحة مكيف وبسس تبين ولا تراك طالق بالثلاث <<<<لا كنه شطح بعيد ههههههههههه اااااااااااااااااااااااه بس <<< سرح الملعون ههههههههههههههههه المهم ان حسون شين الحليا طلع من المدرسة في اول يوم وكان يسمع عند فتحة الباب الوعد على الهده يا ملعون الصيت قسم بالله بفقع وجهك تفقيع <<< الكلمات غير مألوفه لدلخ قروي مثل حسون لكنه حب الاستطلاع وش عندهم الهده هي وش معناها ؟ الوعد بالهده ؟؟ لا يكون بوه شي رح حسون لبرى ولقى كومه من الثياب والكتب تناطل والكل يفرد عضلاته وجمعة شباب من الدشير اكيد ما يحتاج مكونين من لحوج الثقبه دشير العصارات والبدونز ولا يهونون اللي نصهم بالعقربية والباقي مدري منين ملقطينهم اكيد طالبينهم طلبيه من النابية يعني صكت المدرسة وفوق هذا كله 600 الف ددسن عند البوابه اثر السالفه هوشه يا هووووه يقشعر لها البدن وحسون ولا عليه امر شاهد على العصر وفاق عيونه اللي كنهم انوار جيب تويوتا ابو شنب خلصت الهوشه من مجرد ما خشت دورية عند شارع المدرسة وولعت الرماق كلن لقط موتره ونحاش يعني المساله هياط في هياط حسون تل شنطته العلاقي اللي اشمأز منها من يوم شاف الشباب الكوبار يحكون كتبهم في سجادة ولا سير وهو راجع البيت نطل الشنطه بأقرب زباله وخش البيت مرفوع الرأس هالحين نبدأ بصلب الموضوع المشكله حسون يوم دخل البيت تدرون اول شي وش سوى ؟؟ تلقائي نفخ صوته عشان يبرز عند اخوانه النتف وامه انه رجال لانه لو ينفخ صوته بالمدرسه توطوا وجهه لا شعوريا بدى خشمه ينتفخ حبه ونص عشان النسم العميق اثناء تنفيخ الصوت بدى يطالع اخوانه الصغار اللي كان يلعب معهم مثل النمل ساعه مصطر هذا وساعه معلق هذا مثل ما شاف بالهوشة تماما يعني ابراز ذاتيه وغير كذا بدى يحس انه تغير سيلوجيا من يوم بدى يدخل الحمام ومعه موس حلاقه <<< كل شعر البنات من حديقة الميدان هع هع >>> كنك ما تنعطى فيس خشيت دووغري بالاشياء اللي حاذفتها مدينة الملك عبد العزيز المهم مواصفات ومقاييس حسون تغيرت كمبيوتر العائله اللي كان يلعب فيه جدعه لانه يحسه حق بزران وين جالسين كابتن ماجد بزر انا بزر ؟؟ ولو جينا لامه خلها تقوله تعال يا ورع شف وش بيرد عليها انا منب بزر انا انتو كله تقولون لي بزر قسم بالله بيصير شي ما شفتوه ومسكين يقول هالكلام وعيونه تغرغر خايف تجيه ملعقة الخشب حقت الطبخ تمشي 200 كم على وجهه يعني بالعربي مراهقة في ريعان الشباب مع مضي الايام حسون بدت تطلع فيه جبال ووديان وهضبات على وجهه نفط شباب ومشوق الله لا يوريكم لو يعصر الوحده طلع منها منتج جبنة بوك لمدة عام كامل اف بعد ياهي حبوب شباب وخاصة بمطقة الخشم << هو ناقص بعد ؟؟ يكفيه وارم خلقة من طلع من الوكاله هع هع بدى حسون ما يسكر كبكات ثوبه وبدى يلبس طاقية الغباء الطاقية الربع الصغيره بدى يعلق بدال استكرات العلوك حقت السيارات بدى يعلق سيارات ددسن وكووشخت علامة نيسان وكاتب على دالوبه ما يهزك ريح <<< شعنده قطر هع هع بدى يزداد جلافه ما يتروش الا كل اسبوع مره عشان يصير زاحف على حق بدى يحتك بالدشير معه بالصف عشان ياخذ منهم بعض الكلمات النابيه وامثلتها واجد بدى يكتشف العالم المجهول ! احم احم تبوني اشرح لكم ؟؟ معصي انت وياه مواصفات ومقاييس ما حصلتش وكلها تحت سن المراهقة عسى الله يفكنا منه من سن كانه يتعب حسون هالحين ماحد يقدر يكلمه وان كلمه احد بيكون هو الغلطان التفاهم مع ذا السن صعب بالحيل والبلا ان تركناهم تاهو.. يعني يعين الله امه وابوه على بلواهم ويا قلب لا تحزن خلاص خلصنا ****************** ما يستفاد من الحديث المطول / 1- المراهقة سن يجيب الوجع بالراس لكن الحل عند اوبرا في MBC. 2- لا تسوي فيها داشر وتقتبس من غيرك السلوك السيء يعني حركات الدشر والكفت كلها مرت علينا. 3- حبوب الشباب احيان تلصق في الواحد فا لا تفقعها خلها محلها ترى بعدين تذيك اسأل مجرب ولا تسال خبير . 4- يا زين ايام مراهقتنا ما كانت فيها الوضع اللي هالحين طلبات وجوال وغيره يعني صرت بذا الزمان تكد على الولد اكثر من البنت وطلباتها . 5- ترى النوتيلا الصباح مع حليب الزنجبيل حلوة . 6- لا تحب واحد ما درى عنك ترى يعذبك وبين قوسين (مزنه في قلوبنا )!. 7- تسبح لا تصير جلف عزيزي المراهق لان الريحه بذا السن تصير مضاعفه. 8- كل سنه وانتو بخير وتراي مبطي عن الكتابات والصرقعه وعسى تكون كتابتي هذي نالت استحسانكم . ******* شخصي بنت البكار ,,,   ^ ^ ^ مستقبل مبهر ولا يهون اللي بعدوا  المهم تحياتي اعزائي الشرقاويين عزيزاتي الشرقويات ولا حد ينسى يطفي اللمبات لاجاء يطلع  المصدر: منتديات المنطقة الشرقية - من قسم: صرقعه <<< dh gdg hgj[htd ,ag,k rp'i dlad phtd?<<< H[g hgj[htd dlad dh phtd? ,ag,k rp'i . .  التعديل الأخير تم بواسطة مصرقع الشرقيه ; 2009-03-11 الساعة 03:01 PM |
|  |
|
2009-03-11, 03:28 PM
| #2 (permalink) |
| من كبار الاعضاء  تاريخ التسجيل: Oct 2008 الدولة: في الجوار
المشاركات: 6,625
معدل تقييم المستوى: 894 | ياخي لي قرن من الزمان المحلك تنزل موضوع مليت ارجفك اقبصك وانت مسوي على بالك عاقل ومثقف وبس ياخي حركاتك هذي تذكرن بالي تشوفه بالفصل عربجي (( واذا صارت حصة القران لن المدرس عمه تشوووفه ثقل وعاقل ولا يضحك )) ........... مصرقع يالبي وشبك على حسون ياخي كبيت عشاو منذو الصغر حتى بلغ من العمر عتيا بس والله يانك يوم تقول (( عاضن على ثوبه )) ذكرتن بصعفق ولد جيراننا من عرفت اني بالابتدائي وهو كل ما جاء وقت الشهادات (( عض على ثوبه للمدرسه )) يذكرن بحق القناة الاولى الي يقول (( انطلقت الجياد على بركة الله )) :d اما حبك لمزنه يخليك (( تحس انك تحس )) مدري ليه ياخي ياقدم عبارتك (( مزنه في قلوبنا )) اخبر لاعبين النصر يوم كانن البعارين هندل يحطونه على فنايلهم (( فهد في قلوبنا )) والطبله خويي كان اسمه فهد فهو مصدق نفسه ياحسبهم يعانونه << ياخي تبلش بالعباقره يسلموووو يالبي مصرقع ولا تقطع الله يخليك ترى قسم ما حد رفع معنوياتي الا انت ياخي انا حسيت ان المنتدى بعد كم اسبوع بيكتبون (( قسم الصرقعه للتقبيل )):d بس اشوى جيت انت ورفعت من همتي ومعنوياتي المنركله على ارصفة شوراع الدوران لتجعلني اجدد العهد والولا للقسم هذا تم التقيم يالبي مر من هنا قبل شوي سمو الشيخ (( دحيم ))  التعديل الأخير تم بواسطة (חשב כללי) ; 2009-03-11 الساعة 04:52 PM |
|
| |
|
2009-03-11, 04:08 PM
| #3 (permalink) |
| من كبار الاعضاء  تاريخ التسجيل: Nov 2008 الدولة: حيث اكون
المشاركات: 6,469
معدل تقييم المستوى: 837 | وش هذا مصرقع < مادري لية حسيت انك كاتب قصة حياتك هع مسكين حسون حياتة تبكي الحجر < فاهمة غلط هههه استمتعت بقراءة روايتك < من طولها ههه يثلموو |
|
| |
|
2009-03-11, 10:49 PM
| #4 (permalink) | |
| هُنـْوً ـآلْحلـوهـ :$  تاريخ التسجيل: Oct 2008 الدولة: .. بين ـآلحـِنـآيِآ..
المشاركات: 10,930
معدل تقييم المستوى: 1298 | أما عن هذي اقتباس:
 وهم مستآآنسين هع ...ابيهم يزينون ...وينه حسوون بس أفرك خشته زي خواني يستآآهل التقيم << بس مصرقع توقيعك مزيوون أوي << يوهـ أقصد الفرشآه اللي مستخدمها حلووه ينطيك العآآآفيه , .  لَسسسْت مُجَررد آنثى ! انا حُلُم يَتمناهـُ كًل انسسان ، ، . . . .gif) التعديل الأخير تم بواسطة آلهَوْى شَرْقَي ; 2009-03-11 الساعة 10:52 PM | |
|
| |
|
2009-03-14, 09:30 AM
| #5 (permalink) |
| من كبار الاعضاء  تاريخ التسجيل: Oct 2008 الدولة: Ẩļ-Ҝĥỏḃạя
المشاركات: 28,670
معدل تقييم المستوى: 3096 | بجاسوليد تراه زين للاتهاب المفاصل والاغراض<<<هذا وين ينصرف بجاسوليد <<< تررررجمـ وبعدين لزززم نسووووي الطقووووس اللي كاتبه عشااان ندخل بجووو الموووضوع صاحب الحادي عشر ربيعا وثنين خريف واحد صيف كثر شطه <<<<ههههههههههههههههه اعجبتني بس الله يهداك دائما التفكير بالاكل لزم تشطح كان حسون يتمقل عالمه ويسرح في افكاره الشارده تقول قطاوة ملحوقين <<<<هنا اشك انه حسوووون وش سااالفتك مع القطاااوه ..؟؟هع هع اما كمبيوتر العاااايله <<<<اااااااايه يااااما ذل نااااااس كل ماجاء دورهم صرفوه روح جيب ولا رجعت يقوووولون راح دورك اوقفي بدووور لما حسون راح المدرسه في اول يوم له دراسي بالمتوسطه يحسب الوضع ايزي تكت اذا رن الجرس بالفسحه يروح مشوت للمقصف عشان يحجز له زعتر وعصير <<<<زعتر وعصير ماااازلت تاااكلهم اشكوووى لله هههههههههههههههههههههههههههههههههههههههههه بالله متى بتتركهم ..؟؟ نفط شباب ومشوق الله لا يوريكم لو يعصر الوحده طلع منها منتج جبنة بوك لمدة عام كامل <<<تخيلت على طوووول حرام عليك على هاااتشبيه كرهت الجبنه طبعا كله كوووم ومزنه كوووم اخر مراح اعلق دمت بذكريااات مزنه هههههههههههههههههههههههههههههههههههه يعطيك العافيه .. وبأنتظار جديدك بس غير حسوووون     |
|
| |
|
| مواقع النشر (المفضلة) |
| الكلمات الدلالية (Tags) |
| أجل, التجافي, يمشي, يا, حافي؟, وشلون, قحطه |
| أدوات الموضوع | إبحث في الموضوع |
| انواع عرض الموضوع | |
|
|
المواضيع المتشابهه للموضوع: ,,, يا ليل التجافي وشلون قحطه يمشي حافي؟,,, | ||||
| الموضوع | كاتب الموضوع | المنتدى | مشاركات | آخر مشاركة |
| بقلمـ: دافي مشآعر‘, الجرح الاول مابرى وتجرحيني | وللسعادة معنى | الشعر وأبيات القصيد | 7 | 2010-02-02 09:47 PM |
| 1-5من يمسح دمعتك | مغرورة@ | الألعاب الفكرية والتسالي | 55 | 2009-07-23 08:29 PM |
| قصيده الحلم بقلم دافى مشاعر | دافي مشاعر | الشعر وأبيات القصيد | 20 | 2009-07-04 03:12 PM |
| كلن على اصله يعاملك وشلون | نواف الناصر | الشعر وأبيات القصيد | 21 | 2008-10-31 12:30 PM |
Sitemap
الساعة الآن 11:16 PM. 
Copyright © االمنطقة الشرقية Powered by vBulletin® Copyright ©2000 - 2023, Jelsoft Enterprises Ltd.
Search Engine Optimization by vBSEO 3.6.066a66.com
::..:: منتديات ::..::
 |  |
العرض العادي
